విదేశీ గడ్డపై గుండెపోటుతో మునుగోడు వాసి మృతి.
* ఉపాధి కోసం వెళ్ళి తిరిగిరాని లోకాలకు.
* మృతదేహాన్ని స్వదేశానికి తెచ్చేందుకు మంత్రుల చొరవ.
హైదరాబాద్, మహా.
మెరుగైన భవిష్యత్తు కోసం వేల మైళ్ల దూరంలోని ఆఫ్రికా దేశం టాంజానియాకు వెళ్లిన ఒక తెలంగాణ యువకుడు, అక్కడ అనుకోని రీతిలో గుండెపోటుతో మరణించిన ఘటన యావత్ మునుగోడు నియోజకవర్గాన్ని కలచివేసింది. నల్గొండ జిల్లా మునుగోడు మండలం పలివెల గ్రామానికి చెందిన బడుగు రాజు (38) గత మూడేళ్లుగా టాంజానియా రాజధాని దారుస్సలాంలో జియాలజిస్ట్గా విధులు నిర్వహిస్తున్నారు. ఇటీవలే స్వగ్రామానికి వచ్చిన ఆయన, తన భార్యాపిల్లలు, కుటుంబ సభ్యులతో సుమారు నాలుగు నెలల పాటు సంతోషంగా గడిపారు. కేవలం రెండు నెలల క్రితమే తిరిగి టాంజానియా వెళ్లిన రాజు, గురువారం విధుల్లో ఉండగానే ఒక్కసారిగా గుండెపోటు రావడంతో కుప్పకూలిపోయారు. చికిత్స అందేలోపు ఆయన ప్రాణాలు కోల్పోవడం ఆ కుటుంబంలో తీరని విషాదాన్ని నింపింది. ఈ బాధాకరమైన విషయం తెలుసుకున్న స్థానిక ఎమ్మెల్యే కోమటిరెడ్డి రాజగోపాల్ రెడ్డి, శాసనమండలి చైర్మన్ గుత్తా సుఖేందర్ రెడ్డి, మంత్రి శ్రీధర్ బాబు వెంటనే స్పందించారు. పరాయి దేశంలో మరణించిన రాజు భౌతికకాయాన్ని సాధ్యమైనంత త్వరగా భారత్కు తీసుకువచ్చేందుకు వారు విదేశాంగ శాఖ మరియు భారత రాయబార కార్యాలయంతో సంప్రదింపులు జరిపారు. ప్రభుత్వం తరపున అన్ని రకాల సహాయ సహకారాలు అందిస్తామని, మృతదేహం స్వగ్రామానికి చేరేవరకు నిరంతరం పర్యవేక్షిస్తామని నేతలు హామీ ఇచ్చారు.
