ప్రొఫెసర్ నాగేశ్వర్రావుకు ప్రకాష్ రాజ్ అండ.
* ప్రశ్నించే గొంతుకపై డిజిటల్ దాడి ప్రమాదకరం.
*వ్యక్తిత్వ హననం, బెదిరింపులు ప్రజాస్వామ్యమా?
హైదరాబాద్, మహా.
ప్రముఖ రాజకీయ విశ్లేషకులు, ప్రొఫెసర్ కె. నాగేశ్వర్రావు చుట్టూ ముసురుకున్న తాజా సోషల్ మీడియా వివాదంపై వైవిధ్యభరిత నటుడు ప్రకాష్ రాజ్ అత్యంత ఘాటుగా స్పందించారు. ఈ వ్యవహారంలో ప్రొఫెసర్ నాగేశ్వర్రావుకు పూర్తి మద్దతు ప్రకటిస్తూ ప్రకాష్ రాజ్ శనివారం నాడు తన అధికారిక ‘ఎక్స్’ (ట్విట్టర్) వేదికగా ఒక ప్రత్యేక వీడియోను పోస్ట్ చేశారు. ప్రొఫెసర్ నాగేశ్వర్రావు గత కొన్ని దశాబ్దాలుగా నిరంతరం ప్రజల పక్షాన నిలబడి, సామాజిక, రాజకీయ అంశాలపై ఎంతో పరిణతితో గొంతు వినిపిస్తున్నారని ఆయన కొనియాడారు. అయితే ఆయన సుదీర్ఘంగా మాట్లాడిన విశ్లేషణల అంతరార్థాన్ని పక్కన పెట్టేసి, అందులో నుంచి కేవలం ఒకే ఒక్క లైన్ను మాత్రమే స్వార్థపూరితంగా కట్ చేసుకుని, సోషల్ మీడియాలో పెద్ద ఎత్తున ట్రోలింగ్ చేయడం, కేసులు పెట్టడం, ప్రాణహాని బెదిరింపులకు దిగడం దారుణమని మండిపడ్డారు. ఇదా మీరు చూపిస్తున్న ప్రజాస్వామ్యం? లేక మా నాయకుడిని ప్రశ్నిస్తే నాశనం చేస్తామనే స్థాయికి దిగజారిన రాజకీయ గుండాయిజమా? అంటూ ప్రకాష్ రాజ్ తీవ్ర పదజాలంతో నిలదీశారు.
ఈ సందర్భంగా సోషల్ మీడియా వేదికగా సాగుతున్న సరికొత్త రాజకీయ సంస్కృతిని ప్రకాష్ రాజ్ తీవ్రంగా ఎండగట్టారు. నాగేశ్వర్రావు గారు మాట్లాడిన మాటల్లో ఎక్కడైనా తప్పు ఉందనిపిస్తే, దానికి సంబంధించిన చట్టపరమైన ఆధారాలు అడగాలని లేదా రాజకీయంగా సమాధానం చెప్పాలే తప్ప, ఇలా వ్యక్తిత్వ హననానికి (క్యారెక్టర్ అస్సాసినేషన్) పాల్పడడం తగదన్నారు. సామాజిక మాధ్యమాల్లో ఒక మేధావిని అవమానించడం, అక్రమ కేసులతో భయపెట్టాలని చూడడం వంటి చర్యలు ప్రజాస్వామ్య వ్యవస్థలకే గొడ్డలిపెట్టు లాంటివని ఆందోళన వ్యక్తం చేశారు. గతంలో ఇదే నాగేశ్వర్రావు చంద్రబాబు నాయుడు, పవన్ కళ్యాణ్, కేసీఆర్, వైఎస్ జగన్ మోహన్ రెడ్డి, ప్రస్తుత సీఎం రేవంత్ రెడ్డిలతో పాటు కేంద్రంలోని బీజేపీని కూడా ఎన్నో సందర్భాల్లో అత్యంత నిష్పక్షపాతంగా ప్రశ్నించారని గుర్తుచేశారు. అప్పట్లో ఆయన నిజాయితీని మెచ్చుకున్న వారు, ఇప్పుడు ఆయన చెప్పిన ఒక మాట నచ్చలేదనే ఒకే ఒక్క కారణంతో ఆయనపై యుద్ధం ప్రకటించడం వారి ద్వంద్వ వైఖరికి నిదర్శనమని విమర్శించారు.
ప్రస్తుత సమాజంలో ప్రశ్నించే గొంతుకను అక్రమ కేసులతో భయపెట్టి, మౌనం చేయాలని చూడడం సమాజానికి అత్యంత ప్రమాదకరమైన పరిణామమని ప్రకాష్ రాజ్ హెచ్చరించారు. ప్రస్తుత రాజకీయ పరిస్థితుల్లో ఏ ఏ పార్టీలు ఎవరితో పొత్తులు పెట్టుకున్నాయి, తెరవెనుక ఎవరి పొత్తుల్లో కొనసాగుతున్నాయి అనే పూర్తి విషయాలు ఈ దేశ ప్రజలందరికీ బాగా తెలుసని ఆయన వ్యాఖ్యానించారు. నిజాల కోసం, ప్రజల కోసం నిలబడే వ్యక్తులను ఒంటరిని చేయనివ్వబోమని స్పష్టం చేస్తూ, “నాగేశ్వర్రావు గారు.. ఈ పోరాటంలో మీకు అండగా మేము ఉన్నాం” అంటూ ప్రకాష్ రాజ్ తన వీడియో సందేశం ద్వారా భరోసా ఇచ్చారు. ఈ వీడియో నెట్టింట వైరల్గా మారడంతో తెలుగు రాష్ట్రాల రాజకీయ, సామాజిక వర్గాల్లో సరికొత్త చర్చకు తెరలేపింది.
