- డబ్బు లేదని చెప్పుతో కొట్టారు.. అదే నా కసి.హైదరాబాద్, మహా.టాలీవుడ్ ఇండస్ట్రీలో మోస్ట్ కాంట్రవర్షియల్ అండ్ సెన్సేషనల్ ప్రొడ్యూసర్గా పేరు తెచ్చుకున్న బండ్ల గణేష్.. తాజాగా చేసిన వ్యాఖ్యలు అటు సినీ వర్గాల్లో, ఇటు సోషల్ మీడియాలో దావాగ్నిలా రేగుతున్నాయి. కమెడియన్గా కెరీర్ ప్రారంభించి, ఆ తర్వాత సహాయ నటుడిగా, బ్లాక్బస్టర్ చిత్రాల నిర్మాతగా తనకంటూ ఒక ప్రత్యేక గుర్తింపు తెచ్చుకున్న బండ్లన్న.. కొంతకాలంగా సినిమాలకు దూరంగా ఉంటున్నప్పటికీ సోషల్ మీడియా పోస్టులు, పదునైన ఇంటర్వ్యూలతో నిరంతరం వార్తల్లో నిలుస్తూనే ఉన్నారు. ఈ క్రమంలోనే ప్రముఖ నటుడు రాజా రవీంద్ర నిర్వహిస్తున్న పాడ్కాస్ట్ షోకు ముఖ్య అతిథిగా హాజరైన ఆయన, తన జీవితంలోని అత్యంత అవమానకరమైన, ఎవ్వరికీ తెలియని ఒక చీకటి అధ్యాయాన్ని తలచుకొని తీవ్ర భావోద్వేగానికి గురయ్యారు.
సౌందర్య చనిపోయిన రోజు.. ఆ పెద్దాయన నన్ను చెప్పుతో కొట్టాడు!
ఇండస్ట్రీలో తాను ఎదుర్కొన్న ఒక చేదు అనుభవాన్ని పంచుకుంటూ బండ్ల గణేష్ సంచలన విషయాలు వెల్లడించారు. “తెలుగు సినిమా పరిశ్రమలో ఒక పెద్దాయన ఉండేవారు. ఆయన చాలా మంచివారే, నాకు ఎన్నో సందర్భాల్లో సహాయం కూడా చేశారు. కానీ, ఆ రోజు ఆయన ఏ మూడ్లో ఉన్నారో ఏమో నాకు ఇప్పటికీ అర్థం కాదు. నటి సౌందర్య గారు హెలికాప్టర్ ప్రమాదంలో చనిపోయిన దురదృష్టకరమైన రోజు అది. నేను, నా స్నేహితుడైన ఇంకొక నటుడు కలిసి ఆ పెద్దాయన పక్కన కూర్చున్నాం. నాకు సాధారణంగానే అందరినీ ‘సార్.. సార్..’ అని గౌరవంగా పిలవడం అలవాటు. అలాగే ఆయన్ను కూడా సార్ సార్ అంటున్నాను. అంతే.. ఏమైందో ఏమో తెలియదు కానీ, ఆయన ఒక్కసారిగా ఆగ్రహంతో ఊగిపోతూ కాళ్లకున్న చెప్పు తీసుకుని నన్ను కొట్టారు. ఆ అవమానంతో నేను తట్టుకోలేక వెంటనే అక్కడి నుంచి బయటకు వచ్చేశాను. అయితే, ఆ తర్వాత రెండు రోజులకు ఆయన నాకు క్షమాపణలు (సారీ) చెప్పారు” అని బండ్ల గణేష్ ఆ నాటి ఘటనను గుర్తుచేసుకున్నారు.
డబ్బు లేదనే కదా.. అదే నా అచీవ్మెంట్!
ఆ అవమానమే తన జీవితాన్ని, కెరీర్ను మలుపు తిప్పిందని బండ్లన్న చెప్పుకొచ్చారు. “నన్ను చెప్పుతో కొట్టిన వెంటనే బయటకు వచ్చేసి, నాతో ఉన్న మరో వ్యక్తితో ఒకటే చెప్పాను.. ‘బాబాయ్, నా దగ్గర ఈరోజు డబ్బు లేదనే కదా ఆయన నన్ను అంతలా అవమానించి చెప్పుతో కొట్టాడు? ఏదో ఒక రోజు కచ్చితంగా ఆ వ్యక్తి కంటే ఎక్కువ డబ్బు సంపాదించి, అంతకంటే పెద్ద స్థాయిలో నిలబడి చూపిస్తా’ అని ఆ రోజే ప్రతినబూనాను. ఆ రోజు నాలో పుట్టిన కసి, పట్టుదలే నన్ను ఈ రోజు ఈ స్థాయిలో నిలబెట్టాయి. అదే నా జీవితంలో నేను సాధించిన అతిపెద్ద అచీవ్మెంట్” అంటూ బండ్ల గణేష్ భావోద్వేగంగా సమాధానమిచ్చారు.
నెట్టింట మొదలైన వేట.. ఆ సీనియర్ నటుడు ఎవరు?
ఈ ఇంటర్వ్యూ ప్రోమో మరియు వీడియో క్లిప్స్ బయటకు వచ్చిన క్షణం నుంచే టాలీవుడ్ వర్గాల్లో పెద్ద ఎత్తున చర్చ మొదలైంది. తనను అవమానించిన ఆ ‘సీనియర్ పెద్దాయన’ ఎవరనే విషయాన్ని బండ్ల గణేష్ ఎక్కడా బహిర్గతం చేయనప్పటికీ, నెటిజన్లు మాత్రం ఆ నటుడు ఎవరై ఉంటారా అని గూగుల్లో ఆరా తీస్తున్నారు. 2004లో సౌందర్య మరణించిన సమయంలో ఇండస్ట్రీలో టాప్ పొజిషన్లో ఉన్న సీనియర్ నటుల పేర్లను ప్రస్తావిస్తూ సోషల్ మీడియా వేదికగా ఒక్కొక్కరు ఒక్కో రకంగా ఊహాగానాలు గుప్పిస్తున్నారు. ఇండస్ట్రీలో అప్పట్లో జరిగిన ఈ అంతర్గత వివాదం ఇప్పుడు బండ్లన్న కామెంట్లతో మరోసారి టాలీవుడ్ను షేక్ చేస్తోంది.
