నేత్రపర్వం..
* ఆకాశంలో అరుదైన ‘బ్లూ మైక్రోమూన్.
*ఒకే నెలలో రెండో పౌర్ణమి.. 31న కనువిందు.
* సాధారణం కంటే చిన్నగా చందమామ.
* హైదరాబాద్లో సాయంత్రం వీక్షించే వీలు.
హైదరాబాద్, మహా.
నగరవాసులతో పాటు దేశవ్యాప్తంగా ఉన్న ఖగోళ ప్రియులకు మే 31వ తేదీన ఒక అరుదైన, అద్భుతమైన దృశ్యం కనువిందు చేయనుంది. ఆ రోజు రాత్రి ఆకాశంలో ‘బ్లూ మైక్రోమూన్’ కనువిందు చేయబోతోంది. ఒకే క్యాలెండర్ నెలలో రెండోసారి పౌర్ణమి రావడం, అదే సమయంలో ఈ ఏడాదిలోనే చంద్రుడు భూమికి అత్యంత దూరంలో ఉండి చాలా చిన్నగా కనిపించనుండటం ఈ ఖగోళ అద్భుతానికి ఉన్న ప్రధాన ప్రత్యేకత.
ఈ ఏడాది మే నెలలో ఏకంగా రెండు పౌర్ణములు సంభవిస్తున్నాయి. మొదటి పౌర్ణమి మే 1న రాగా, రెండోది మే 31న రానుంది. సాధారణంగా ఒకే నెలలో రెండోసారి వచ్చే పౌర్ణమిని ఖగోళ పరిభాషలో ‘బ్లూ మూన్’ అని పిలుస్తారు. దానికి తోడు, మే 31న చంద్రుడు భూమికి అత్యంత దూరంలో (అపోజీ) ఉండనున్నాడు. ఇలా భూమికి దూరంగా ఉన్నప్పుడు పౌర్ణమి వస్తే దాన్ని ‘మైక్రోమూన్’ అని అంటారు. ఇలా బ్లూ మూన్, మైక్రోమూన్ రెండూ ఒకేసారి కలిసి రావడం చాలా అరుదైన పరిణామమని ఖగోళ నిపుణులు చెబుతున్నారు.
ఈ బ్లూ మైక్రోమూన్ సాధారణ పౌర్ణమి రోజు కనిపించే చంద్రుడి కంటే 6 నుంచి 7 శాతం చిన్నగా, కొంచెం తక్కువ ప్రకాశవంతంగా దర్శనమిస్తుంది. అయితే, దీనికి ‘బ్లూ మూన్’ అని పేరు ఉన్నప్పటికీ చంద్రుడు ఏమాత్రం నీలం రంగులో కనిపించడని, ఇది కేవలం ఒక నామకరణం మాత్రమేనని శాస్త్రవేత్తలు స్పష్టం చేస్తున్నారు. ఇక నగరవాసులు ఈ అద్భుతాన్ని మే 31న సాయంత్రం 6:30 నుంచి 7:30 గంటల మధ్య తూర్పు వైపు ఆకాశంలో అత్యంత స్పష్టంగా చూడవచ్చు. వాతావరణం అనుకూలిస్తే ఎలాంటి టెలిస్కోప్లు, ఇతర ప్రత్యేక పరికరాలు అవసరం లేకుండానే నేరుగా కళ్లతోనే ఈ అద్భుతాన్ని వీక్షించవచ్చు. ఈ అరుదైన సమయంలో చంద్రుడు స్కార్పియస్ రాశిలోని ప్రకాశవంతమైన అంటారిస్ నక్షత్రానికి అత్యంత సమీపంలో కనువిందు చేయనున్నాడు.
