బంగ్లాదేశ్లో భగ్గుమన్న హిందూ లోకం.
* శ్రీరాముడి చిత్రపటంపై చెప్పుతో అవమానం, ఢాకా వీధుల్లో వెల్లువెత్తిన నిరసనలు.
* మైనారిటీలపై దాడులను నిరసిస్తూ జై శ్రీరామ్ నినాదాలతో కదం తొక్కిన వేలాది మంది.
ఢిల్లీ, మహా.
పొరుగు దేశం బంగ్లాదేశ్లో మరోసారి తీవ్ర ఉద్రిక్త పరిస్థితులు నెలకొన్నాయి. హిందువుల ఆరాధ్య దైవం, మర్యాదా పురుషోత్తముడైన శ్రీరాముడి చిత్రపటంపై గుర్తుతెలియని వ్యక్తులు చెప్పు ఉంచి దారుణంగా అవమానించడంపై అక్కడి హిందూ సమాజం తీవ్ర ఆగ్రహం వ్యక్తం చేస్తోంది. తమ మత విశ్వాసాలపై జరుగుతున్న ఈ దాడులను నిరసిస్తూ రాజధాని ఢాకాలో శుక్రవారం వేలాది మంది హిందువులు రోడ్లపైకి వచ్చి కదం తొక్కారు. కాగడాలు, కొవ్వొత్తులు చేతబూని ‘జై శ్రీరామ్’ నినాదాలతో ఢాకా వీధులను హోరెత్తించారు. మైనారిటీల పట్ల జరుగుతున్న వివక్షను, దాడులను ఇకపై ఎంతమాత్రం సహించేది లేదని వారు స్పష్టం చేశారు.
ఈ తాజా ఉద్రిక్తతలకు ముందు జరిగిన పరిణామాలు కూడా మైనారిటీల పట్ల నెలకొన్న అభద్రతా భావాన్ని తేటతెల్లం చేస్తున్నాయి. ఉత్తర బంగ్లాదేశ్లోని గాయిబంద జిల్లాలో గల శ్రీశ్రీ రాధాగోవింద దేవాలయ కమిటీ ఇటీవల ఒక బృహత్తర కార్యక్రమానికి శ్రీకారం చుట్టింది. అందులో భాగంగా 81 అడుగుల భారీ శ్రీరాముడి విగ్రహాన్ని ప్రతిష్టించేందుకు సన్నాహాలు ప్రారంభించింది. అయితే, ఈ ఆధ్యాత్మిక కార్యక్రమానికి స్థానిక అతివాద శక్తుల నుంచి తీవ్ర స్థాయిలో బెదిరింపులు రావడంతో, శాంతి భద్రతలను దృష్టిలో ఉంచుకుని ఆ కార్యక్రమాన్ని తాత్కాలికంగా వాయిదా వేశారు. ఈ ఘటన మరువక ముందే, తాజాగా శ్రీరాముడిని కించపరుస్తూ కొందరు దుండగులు అవమానకర చర్యలకు పాల్పడటం పరిస్థితిని మరింత దిగజార్చింది. ఈ వరుస ఘటనలతో సహనం కోల్పోయిన హిందూ సమాజం ఒక్కసారిగా భగ్గుమంది. జాతీయ మీడియాలో సైతం ఈ వార్తలు ప్రముఖంగా ప్రసారం కావడంతో ఆందోళనలు తీవ్రరూపం దాల్చాయి.
ఈ క్రమంలో తమకు న్యాయం చేయాలని, దోషులను కఠినంగా శిక్షించాలని డిమాండ్ చేస్తూ ఢాకాలో భారీ ఎత్తున నిరసన ప్రదర్శనలు వెల్లువెత్తాయి. ‘హిందూ మహాజ్యోత్’ సంస్థ ఇచ్చిన పిలుపు మేరకు శుక్రవారం నాడు వివిధ హిందూ సంఘాల ప్రతినిధులు, సామాన్య ప్రజలు పెద్ద సంఖ్యలో షహబాగ్ కూడలికి చేరుకున్నారు. అక్కడినుంచి నేషనల్ ప్రెస్ క్లబ్ వరకు ఒక భారీ ర్యాలీగా కదిలారు. దారిపొడవునా జై శ్రీరామ్ నామస్మరణతో నినదిస్తూ, తమ ఐక్యతను చాటారు. ప్రెస్ క్లబ్ వద్దకు చేరుకున్న నిరసనకారులు ఒక భారీ మానవహారంగా ఏర్పడి తమ నిరసన గళాన్ని వినిపించారు. అదే సమయంలో మరికొంత మంది ఆందోళనకారులు ఢాకా రిపోర్టర్స్ యూనిటీ భవనం ఎదుట కూడా ఆందోళనకు దిగడంతో రాజధానిలో పరిస్థితి ఉద్రిక్తంగా మారింది.
కేవలం రాజధానిలోనే కాకుండా ఇతర ప్రాంతాలకు కూడా ఈ నిరసన సెగలు వ్యాపించాయి. రంగపూర్లో శాంతియుతంగా నిరసన తెలుపుతున్న ఆందోళనకారులను పోలీసులు అడ్డుకునే ప్రయత్నం చేయడంతో అక్కడ పరిస్థితి మరింత ఉద్రిక్తంగా మారింది. బంగ్లాదేశ్లో మైనారిటీలుగా ఉన్న హిందువులు తమ మత స్వేచ్ఛ కోసం ఇన్ని ఇబ్బందులు పడుతున్నప్పటికీ, ప్రభుత్వం ఏమాత్రం పట్టించుకోకుండా మౌన ప్రేక్షక పాత్ర పోషిస్తోందని నిరసనకారులు తీవ్ర స్థాయిలో ఆరోపించారు. తమ పవిత్ర దైవాన్ని అవమానించిన దుర్మార్గులను వెంటనే గుర్తించి, రాబోయే 72 గంటల్లోగా వారిని అరెస్టు చేసి కఠినంగా శిక్షించాలని వారు ప్రభుత్వానికి అల్టిమేటమ్ జారీ చేశారు. ఒకవేళ తమ డిమాండ్లను ప్రభుత్వం నిర్లక్ష్యం చేస్తే, భవిష్యత్తులో ఈ నిరసన కార్యక్రమాలను దేశవ్యాప్తంగా మరింత ఉధృతం చేస్తామని హిందూ సంఘాల నాయకులు ప్రభుత్వానికి తీవ్ర హెచ్చరికలు పంపారు.
పాక్లో నెత్తురోడిన రహదారి….
Editor
