- వన్‌ నేషన్‌–వన్‌ ఎలక్షన్‌’కు వ్యతిరేకం.
- ప్రభుత్వ సలహాదారు వి.హనుమంతరావు.
హైదరాబాద్‌, మహా .
రాష్ట్రంలో భూ సమస్యలకు గత ప్రభుత్వం తీసుకొచ్చిన ధరణి విధానమే ప్రధాన కారణమని ప్రభుత్వ సలహాదారు వి.హనుమంతరావు ఆరోపించారు. భూములకు సంబంధించిన సమస్యలతో ప్రజలు తీవ్ర ఇబ్బందులు పడుతున్నారని, ముఖ్యంగా గతంలో ఇందిరాగాంధీ హయాంలో పేదలకు పంపిణీ చేసిన భూములు సైతం తిరిగి అక్రమ రిజిస్ట్రేషన్లకు గురవుతున్నాయని ఆయన ఆందోళన వ్యక్తం చేశారు. రిజిస్ట్రేషన్‌ కార్యాలయాల్లో చోటుచేసుకుంటున్న తప్పిదాలపై రెవెన్యూ శాఖ అప్రమత్తంగా వ్యవహరించి కఠిన చర్యలు తీసుకోవాలని సూచించారు.
బుధవారం హైదరాబాద్‌లోని గాంధీభవన్‌లో నిర్వహించిన ప్రజలతో ముఖాముఖి కార్యక్రమంలో వీహెచ్‌ పాల్గొని ప్రజలు, కాంగ్రెస్‌ కార్యకర్తల నుంచి అర్జీలు స్వీకరించారు. ఈ సందర్భంగా ఆయన మాట్లాడుతూ.. గత బీఆర్‌ఎస్‌ ప్రభుత్వం నిర్మించిన ప్రగతిభవన్‌ ప్రజలకు అందుబాటులో లేకుండా పోయిందని విమర్శించారు. ప్రజలు తమ సమస్యలను నేరుగా పాలకుల దృష్టికి తీసుకెళ్లే అవకాశం లేకుండా అప్పటి ప్రభుత్వం వ్యవహరించిందన్నారు. కాంగ్రెస్‌ ప్రభుత్వం అధికారంలోకి వచ్చిన తర్వాత ప్రగతిభవన్‌ను ప్రజాభవన్‌గా మార్చి ప్రజల సమస్యల పరిష్కారానికి వేదికగా రూపొందించిందని తెలిపారు. అదే తరహాలో గాంధీభవన్‌ను కూడా ప్రజల సమస్యలు తెలుసుకుని పరిష్కరించే వేదికగా తీర్చిదిద్దేందుకు ముఖాముఖి కార్యక్రమాలు నిర్వహిస్తున్నామని చెప్పారు.
బుధవారం తన దృష్టికి వచ్చిన అర్జీల్లో అత్యధికంగా భూములకు సంబంధించిన సమస్యలే ఉన్నాయని వీహెచ్‌ తెలిపారు. పాత పటేల్‌–పట్వారి వ్యవస్థలో భూ వ్యవహారాలపై స్థానిక స్థాయిలో స్పష్టమైన సమాచారం ఉండేదని, అందువల్ల సమస్యలు తక్కువగా ఉండేవని అన్నారు. గత ప్రభుత్వం తీసుకొచ్చిన ధరణి వ్యవస్థతో ప్రజలకు అనేక కొత్త సమస్యలు తలెత్తాయని ఆరోపించారు. పేదలకు గతంలో పంపిణీ చేసిన భూములను తిరిగి కొందరు భూస్వాములు అక్రమంగా రిజిస్ట్రేషన్‌ చేసుకుంటున్నారనే ఫిర్యాదులు తన దృష్టికి వచ్చాయని చెప్పారు.
రిజిస్ట్రేషన్‌ కార్యాలయాల్లో రికార్డుల పరిశీలన, భూముల హక్కుల నిర్ధారణలో మరింత జాగ్రత్త అవసరమని వీహెచ్‌ అన్నారు. పేదల భూములు అన్యాక్రాంతం కాకుండా ప్రభుత్వం ప్రత్యేక దృష్టి సారించాలని కోరారు. భూ రికార్డుల్లో తప్పులు, అక్రమ బదలాయింపులు, రిజిస్ట్రేషన్లలో అవకతవకలపై సమగ్రంగా పరిశీలించి బాధ్యులపై చర్యలు తీసుకోవాల్సిన అవసరం ఉందన్నారు.
ఇదే సమయంలో కేంద్ర ప్రభుత్వం ప్రతిపాదిస్తున్న ‘వన్‌ నేషన్‌–వన్‌ ఎలక్షన్‌’ విధానంపైనా వీహెచ్‌ తీవ్రంగా స్పందించారు. దేశంలోని భిన్న సామాజిక, మత, కుల నేపథ్యాలను పరిగణనలోకి తీసుకోకుండా ఒకే సమయంలో ఎన్నికలు నిర్వహించడం సాధ్యం కాదని అభిప్రాయపడ్డారు. అమెరికా తరహా ఎన్నికల విధానాన్ని భారత్‌లో అమలు చేయాలని ప్రయత్నించడం సరికాదన్నారు. ప్రధాని నరేంద్ర మోదీ, అమెరికా అధ్యక్షుడు డొనాల్డ్‌ ట్రంప్‌తో ఉన్న సంబంధాల నేపథ్యంలో భారత్‌ను కూడా అమెరికా తరహాలో మార్చాలని చూస్తున్నారంటూ ఆయన విమర్శించారు.
భారత్‌ భిన్నత్వంలో ఏకత్వాన్ని కలిగిన సెక్యులర్‌ దేశమని, ఇక్కడ అనేక మతాలు, కులాలు, ప్రాంతాలు ఉన్నాయని వీహెచ్‌ పేర్కొన్నారు. ఇలాంటి దేశంలో ఒకే ఎన్నికల విధానం అమలు చేయడం వల్ల అనేక వర్గాల ప్రయోజనాలకు భంగం కలిగే అవకాశం ఉందన్నారు. ముఖ్యంగా బీసీలకు న్యాయం జరిగేలా ముందుగా కులగణన, ప్రాతినిధ్యం వంటి అంశాలను స్పష్టంగా పరిష్కరించాలని డిమాండ్‌ చేశారు.
కులగణనలో బీసీలకు తగిన ప్రాధాన్యం ఇవ్వకుండా ‘వన్‌ నేషన్‌–వన్‌ ఎలక్షన్‌’ గురించి మాట్లాడటం ఎలా సమంజసమని వీహెచ్‌ ప్రశ్నించారు. దేశ జనాభాలో బీసీలు పెద్ద సంఖ్యలో ఉన్నప్పటికీ వారికి తగిన ప్రాతినిధ్యం, హక్కులపై స్పష్టత రావాల్సిన అవసరం ఉందన్నారు. ‘‘మేము వన్‌ నేషన్‌–వన్‌ ఎలక్షన్‌కు వ్యతిరేకం’’ అని ఆయన స్పష్టం చేశారు.
కులగణన పేరుతో ఓట్ల తొలగింపు జరుగుతోందంటూ వీహెచ్‌ ఆరోపించారు. తెలంగాణలో ఉన్న ఓట్ల సంఖ్యకు, ఎన్నికల సంఘం లెక్కలకు మధ్య తేడా ఉందని పేర్కొన్నారు. ఓటర్ల జాబితాలపై సమగ్ర పరిశీలన జరిపి అర్హులైన ప్రతి ఒక్కరి ఓటు హక్కును పరిరక్షించాలని ఆయన డిమాండ్‌ చేశారు. ప్రజల సమస్యలను నేరుగా తెలుసుకుని వాటి పరిష్కారానికి ప్రభుత్వం, పార్టీ యంత్రాంగం సమన్వయంతో పనిచేయాలని వీహెచ్‌ సూచించారు.
