- డ్రైవర్ చేత లంచాలు, కుమార్తె అకౌంట్‌కు డబ్బులు ట్రాన్స్‌ఫర్
- ఏసీబీ దాడుల్లో విస్తుగొలిపే విషయాలు
భూపాలపల్లి, మహా : జయశంకర్‌ భూపాలపల్లి జిల్లా భూగర్భ గనుల శాఖ అసిస్టెంట్‌ డైరెక్టర్‌ (ఏడీ) బొజ్జ జయరాజుపై అవినీతి నిరోధక శాఖ (ఏసీబీ) చేపట్టిన సోదాలు తెలంగాణలో తీవ్ర కలకలం రేపుతున్నాయి. ఆదాయానికి మించి ఆస్తులు కూడబెట్టారన్న ఆరోపణలపై గురువారం ఉదయం నుంచి హైదరాబాద్‌, భూపాలపల్లి, సూర్యాపేట, తాండూరు సహా పలు ప్రాంతాల్లో ఏసీబీ అధికారులు ఏకకాలంలో తనిఖీలు నిర్వహించారు. సోదాల తర్వాత ఏసీబీ అధికారులు జయరాజును అరెస్టు చేశారు. ఏసీబీ తనిఖీల్లో జయరాజుకు సంబంధించిన ఆస్తుల వివరాలు భారీగా వెలుగులోకి వచ్చినట్లు అధికారులు తెలిపారు. ఆయన మొత్తం ఆస్తుల విలువ దాదాపు రూ.100 కోట్లు ఉంటుందని అధికారులు అంచనా వేస్తున్నారు. హైదరాబాద్‌లోని బోడుప్పల్‌లో జీ ప్లస్ 2 భవనం, కేపీహెచ్‌బీలో ఫ్లాట్‌, కీసర, తూప్రాన్‌, తుంగతుర్తి, సూర్యాపేట ప్రాంతాల్లో ప్లాట్లు, వ్యవసాయ భూములకు సంబంధించిన పత్రాలను అధికారులు గుర్తించినట్లు తెలుస్తోంది. సూర్యాపేటలో 3.21 ఎకరాల వ్యవసాయ భూమి ఉన్నట్లు రిజిస్ట్రేషన్‌ పత్రాల ద్వారా గుర్తించినట్లు తెలుస్తోంది. సోదాల్లో గుర్తించిన ఆస్తుల డాక్యుమెంట్‌ విలువ రూ.3.06 కోట్లకు పైగా ఉండగా.. వాటి మార్కెట్‌ విలువ మరింత ఎక్కువగా ఉండొచ్చని అధికారులు అంచనా వేస్తున్నట్లు సమాచారం.
ఈ కేసులో మైనింగ్ ఏడీ బొజ్జ జయరాజు డ్రైవర్ సత్తునూరి యాదయ్య వ్యవహారం కూడా తీవ్ర ఆసక్తికరంగా మారింది. ఏసీబీ అధికారులు డ్రైవర్ మొబైల్‌ ఫోన్‌, బ్యాంకు అకౌంట్లను పరిశీలించగా కీలక లావాదేవీలు బయటపడినట్లు తెలుస్తోంది. ఇసుక రవాణాదారులు, మైనింగ్ వ్యాపారుల నుంచి లంచాలుగా డబ్బులు వసూలు చేసి డ్రైవర్ తన అకౌంట్ లో జమ చేసేవాడని ఏసీబీ అనుమానిస్తోంది. ఆ తర్వాత ఆ మొత్తాన్ని జయరాజు కుమార్తె బ్యాంకు ఖాతాకు బదిలీ చేసినట్లు దర్యాప్తులో గుర్తించినట్లు సమాచారం. ఇలా పలు దఫాలుగా సుమారు రూ.24.80 లక్షలు బదిలీ అయినట్లు ఏసీబీ అధికారులు ప్రాథమికంగా గుర్తించినట్లు తెలుస్తోంది. ఇసుక రవాణాదారుల నుంచి డబ్బులు వసూలు చేసినట్లు డ్రైవర్ విచారణలో వెల్లడించినట్లు అధికారులు పేర్కొన్నట్లు సమాచారం.
ఏసీబీ సోదాల్లో జయరాజు నివాసంలో రూ.10.03 లక్షల నగదు, బ్యాంకు అకౌంట్ లో సుమారు రూ.71.27 లక్షల నిల్వలు గుర్తించినట్లు సమాచారం. 629 గ్రాముల బంగారు ఆభరణాలు, 3 కార్లు, 2 బైక్‌లు కూడా గుర్తించినట్లు ఏసీబీ అధికారులు తెలిపారు. ఎల్‌ఐసీ, మ్యాక్స్‌ లైఫ్‌ సేవింగ్స్‌లో రూ.19.86 లక్షలు, పోస్టాఫీస్‌ సేవింగ్స్‌లో రూ.20.86 లక్షలు ఉన్నట్లు ప్రాథమికంగా గుర్తించినట్లు తెలుస్తోంది. ఇంట్లోని ఫర్నీచర్ విలువ కూడా లక్షల్లో ఉన్నట్లు సమాచారం.
సోదాల్లో బయటపడిన ఆస్తుల విషయంలో వివిధ లెక్కలు వెలువడుతున్నాయి. కొన్ని నివేదికల్లో మార్కెట్‌ విలువ సుమారు రూ.100 కోట్ల వరకు ఉండొచ్చని పేర్కొంటుండగా.. ఏసీబీ ప్రాథమికంగా గుర్తించిన డాక్యుమెంట్‌ విలువ మాత్రం రూ.3.06 కోట్లకు పైగా ఉన్నట్లు సమాచారం. అందువల్ల ఆస్తుల తుది విలువపై ఏసీబీ దర్యాప్తు పూర్తయ్యే వరకు స్పష్టత వచ్చే అవకాశం ఉంది. జయరాజుకు సంబంధించిన బినామీ ఆస్తులు, బ్యాంకు లావాదేవీలు, ఇతర వ్యక్తుల పాత్రపై కూడా ఏసీబీ అధికారులు దృష్టి సారించినట్లు తెలుస్తోంది. ఈ కేసులో మరిన్ని వివరాలు దర్యాప్తు పూర్తయిన తర్వాత వెల్లడయ్యే అవకాశం ఉంది.
