- పంజాబ్ కింగ్స్ ఆటగాళ్లకు యువరాజ్ సింగ్ ‘చెప్పుల’ వార్నింగ్!ఢిల్లీ, మహా.
టీమిండియా మాజీ డాషింగ్ ఆల్రౌండర్ యువరాజ్ సింగ్ తనదైన శైలిలో పంజాబ్ కింగ్స్ యువ ఆటగాళ్లపై ఆగ్రహం వ్యక్తం చేశాడు. మైదానంలో ఆటను పక్కనబెట్టి సోషల్ మీడియాలో ఎక్కువగా మునిగిపోతున్న క్రికెటర్ల ప్రవర్తనపై ఆయన కాస్త గట్టిగానే స్పందించాడు. పంజాబీ భాషలో యూవీ చేసిన ఒక ఘాటు కామెంట్ ప్రస్తుతం సామాజిక మాధ్యమాల్లో విపరీతంగా వైరల్గా మారింది.
ఇటీవల పంజాబ్ కింగ్స్ ఆల్రౌండర్ హరిప్రీత్ బ్రరర్ తన సహచర ఆటగాళ్లు ప్రియాంష్ ఆర్య, అర్షదీప్ సింగ్లతో కలిసి దిగిన ఒక ఫొటోను ఇన్స్టాగ్రామ్లో పంచుకున్నాడు. ఆ ఫొటోకు “స్లాగర్ అండ్ వ్లాగర్” అంటూ కాస్త సరదా క్యాప్షన్ జోడించాడు. ఈ పోస్టుపై అభిమానులతో పాటు పలువురు క్రికెటర్లు విభిన్నంగా స్పందిస్తూ కామెంట్లు పెట్టారు. అయితే వీరందరి కంటే భిన్నంగా టీమిండియా సీనియర్ క్రికెటర్ యువరాజ్ సింగ్ పెట్టిన కామెంట్ అందరి దృష్టిని ఆకర్షించింది.
“తుహాడే సారియాన్ దే చప్పలాన్ దా టైమ్ హో గయా హై హుణ్” అంటూ పంజాబీలో యూవీ కామెంట్ చేశాడు. దీనికి తెలుగులో సరళమైన అర్థం చూసుకుంటే.. “ఇప్పుడైతే మీ అందరినీ చెప్పులతో కొట్టాల్సిన సమయం ఆసన్నమైంది” అని వస్తుంది. యువ ఆటగాళ్లు ఆటను వదిలేసి సోషల్ మీడియాలో కాలక్షేపం చేస్తుండటంపై యూవీ తీవ్ర అసంతృప్తితో ఉన్నాడని, అందుకే ఈ తరహాలో గట్టి వార్నింగ్ ఇచ్చాడని అభిమానులు భావిస్తున్నారు. అయినప్పటికీ యువరాజ్ చేసిన ఈ వ్యాఖ్యను క్రికెట్ ప్రియులు నెగెటివ్గా కాకుండా, ఒక సీనియర్ అన్నగా తమ్ముళ్లపై చూపించే “టఫ్ లవ్” (కఠినమైన ప్రేమ) గా అభివర్ణిస్తున్నారు. రీల్స్, వ్లాగ్స్ అంటూ విలువైన సమయాన్ని వృధా చేసుకోకుండా, కేవలం ఆటపైనే పూర్తి దృష్టి పెట్టాలని యువ క్రికెటర్లకు యూవీ హితవు పలికాడని నెటిజన్లు పేర్కొంటున్నారు.
ఇటీవల కాలంలో పంజాబ్ కింగ్స్ ఆటగాళ్ల సోషల్ మీడియా పోస్టులు నిరంతరం చర్చనీయాంశంగా మారుతున్నాయి. ముఖ్యంగా స్టార్ బౌలర్ అర్ష్దీప్ సింగ్ సోషల్ మీడియా యాక్టివిటీస్పై అభిమానుల నుంచి మిశ్రమ స్పందనలు వ్యక్తమవుతున్నాయి. గతంలో తిలక్ వర్మ, ప్రియాంశ్ ఆర్యలతో అతడు జరిపిన ఆన్లైన్ సరదా సంభాషణలు కూడా తీవ్ర దుమారం రేపాయి. ఈ నేపథ్యంలోనే యువరాజ్ సింగ్ చేసిన తాజా వ్యాఖ్యల తర్వాత అభిమానులు పెద్ద ఎత్తున స్పందిస్తున్నారు. “సీనియర్లు చెప్పే హితబోధను యువ ఆటగాళ్లు కచ్చితంగా వినాలి” అని కొందరు అంటుంటే.. “యువీ పాజీ స్టైలే వేరు, తప్పు చేస్తే తల దలపాల్సిందే” అంటూ మరికొందరు సోషల్ మీడియా వేదికగా మద్దతుగా కామెంట్లు పెడుతున్నారు.
