పార్టీ క్రమశిక్షణ ఉల్లంఘిస్తే కఠిన చర్యలు.
* పాలకుర్తి వివాదంపై విచారణ పూర్తి.
*గ్రూపు రాజకీయాలతో నష్టం జరిగితే ఊపేక్షించబోం.
* కమిటీ చైర్మన్ మల్లు రవి హెచ్చరిక.
* పరిశీలకుడిగా ఎమ్మెల్సీ శంకర్ నాయక్ నియామకం.. కామారెడ్డి నేతకు నోటీసులు.
హైదరాబాద్, మహా.
తెలంగాణ రాష్ట్ర కాంగ్రెస్ పార్టీలో అంతర్గత విభేదాలు, గ్రూపు రాజకీయాలపై అధిష్టానం కన్నెర్ర చేసింది. పార్టీ క్రమశిక్షణను ఉల్లంఘిస్తూ, అంతర్గత కలహాలకు కారణమవుతున్న నేతలపై కఠిన చర్యలు తీసుకునేందుకు రాష్ట్ర కాంగ్రెస్ క్రమశిక్షణ కమిటీ (డిసిప్లినరీ యాక్షన్ కమిటీ) రంగంలోకి దిగింది. ఇందులో భాగంగానే ఆదివారం హైదరాబాద్లోని గాంధీభవన్లో క్రమశిక్షణ కమిటీ చైర్మన్ డాక్టర్ మల్లు రవి అధ్యక్షతన అత్యున్నత స్థాయి సమావేశం జరిగింది. ఈ భేటీలో రాష్ట్రంలోని పలు నియోజకవర్గాల నుంచి వచ్చిన ఫిర్యాదులు, ముఖ్యంగా పాలకుర్తి, కామారెడ్డి వ్యవహారాలపై కమిటీ సుదీర్ఘంగా చర్చించి కీలక నిర్ణయాలు తీసుకుంది.
**పాలకుర్తి పంచాయితీపై లోతైన విచారణ..**
ఇటీవలి కాలంలో పాలకుర్తి నియోజకవర్గ కాంగ్రెస్ పార్టీలో స్థానిక శాసనసభ్యురాలు (ఎమ్మెల్యే) మామిడాల యశస్విని రెడ్డి, సీనియర్ నాయకురాలు ఝాన్సీ రెడ్డి వర్గాల మధ్య తీవ్రస్థాయిలో విభేదాలు తలెత్తాయి. ఈ రెండు వర్గాల మధ్య సాగుతున్న గ్రూపు రాజకీయాలపై క్రమశిక్షణ కమిటీకి చేరిన ఫిర్యాదుపై ఆదివారం నాటి సమావేశంలో క్షుణ్ణంగా విచారణ జరిపారు. ఈ వివాదానికి సంబంధించి ఎమ్మెల్యే యశస్విని రెడ్డి, నేత ఝాన్సీ రెడ్డి ఇద్దరితోనూ కమిటీ సభ్యులు సుదీర్ఘంగా మాట్లాడి వివరాలు సేకరించారు. నియోజకవర్గంలో ఇలా రెండు విడివిడి గ్రూపులు నడపడం వల్ల క్షేత్రస్థాయిలో పార్టీ ప్రతిష్ట దెబ్బతినడంతో పాటు తీవ్ర నష్టం జరుగుతోందని చైర్మన్ మల్లు రవి ఈ సందర్భంగా అసంతృప్తి వ్యక్తం చేశారు. పాలకుర్తిలో పరిస్థితిని చక్కదిద్ది, ఇరు వర్గాలను సమన్వయం చేయడం కోసం సరికొత్త కార్యాచరణను ప్రకటించారు. ఇందులో భాగంగానే కాంగ్రెస్ సీనియర్ నేత, ఎమ్మెల్సీ శంకర్ నాయక్ను పాలకుర్తి నియోజకవర్గ ప్రత్యేక పరిశీలకుడిగా (ఇన్ఛార్జ్గా) నియమిస్తున్నట్లు మల్లు రవి వెల్లడించారు. శంకర్ నాయక్ స్థానికంగా పర్యటించి నివేదిక సమర్పించిన అనంతరం తదుపరి చర్యలు ఉంటాయని స్పష్టం చేశారు.
**కామారెడ్డి నేతకు షోకాజ్ నోటీసులు..**
మరోవైపు కామారెడ్డి నియోజకవర్గ కాంగ్రెస్ పార్టీలోనూ అసమ్మతి రాగం వినిపించింది. కామారెడ్డికి చెందిన కాంగ్రెస్ నాయకుడు గడ్డం చంద్రశేఖర్ రెడ్డి పార్టీ లైన్ దాటి వ్యవహరిస్తున్నారని, క్రమశిక్షణను ఉల్లంఘిస్తున్నారంటూ స్థానిక కీలక నేతల నుంచి కమిటీకి లిఖితపూర్వక ఫిర్యాదు అందింది. ఈ ఫిర్యాదును తీవ్రంగా పరిగణించిన క్రమశిక్షణ కమిటీ చైర్మన్ మల్లు రవి.. నేతలు సమర్పించిన ఆధారాల మేరకు గడ్డం చంద్రశేఖర్ రెడ్డికి తక్షణమే వివరణ కోరుతూ నోటీసులు జారీ చేయాలని ఆదేశించారు. పార్టీలో ఎవరైనా సరే క్రమశిక్షణ గీత దాటితే ఎంతటి వారినైనా ఉపేక్షించే ప్రసక్తే లేదని, అంతర్గత ప్రజాస్వామ్యం పేరుతో పార్టీ నష్టపోయే పనులు చేస్తే కఠిన చర్యలు తప్పవని మల్లు రవి ఈ సందర్భంగా గట్టి హెచ్చరికలు జారీ చేశారు. ఈ తాజా చర్యలతో కాంగ్రెస్ శ్రేణుల్లో ఒక్కసారిగా కలకలం రేగింది.
