పాడి రైతులకు ప్రగతి భరోసా….

పాడి రైతులకు ప్రగతి భరోసా..
* ఆసరాగా నిలవనున్న ప్రజా ప్రభుత్వం!
* విజయ డెయిరీకి పునర్వైభవం.
* 27 లక్షల మంది విద్యార్థులకు పౌష్టికాహారంగా పాలు.
* బకాయిలు లేకుండా సకాలంలో చెల్లింపులు.
* ఉప ముఖ్యమంత్రి మల్లు భట్టి విక్రమార్క.
హైదరాబాద్, మహా.
తెలంగాణ రాష్ట్రంలో గ్రామీణ ఆర్థిక వ్యవస్థకు వెన్నెముకగా నిలిచే పాడి పరిశ్రమకు పూర్వ వైభవం తీసుకువచ్చే దిశగా ప్రజా ప్రభుత్వం చారిత్రక అడుగులు వేస్తోంది. పాడి రైతుల సంక్షేమమే ధ్యేయంగా అద్భుతమైన ప్రణాళికలకు శ్రీకారం చుడుతోంది. ఈ క్రమంలో ప్రతి పాడి రైతుకు అడుగడుగునా ప్రభుత్వం అండగా నిలుస్తుందని, వారిలో పూర్తిస్థాయి భరోసా కల్పిస్తామని రాష్ట్ర ఉప ముఖ్యమంత్రి మల్లు భట్టి విక్రమార్క ఉద్ఘాటించారు. శనివారం రాష్ట్ర సచివాలయంలో పాలు, పాల ఉత్పత్తుల సేకరణ, వినియోగంపై సంబంధిత అధికారులతో ఆయన అత్యున్నత స్థాయి సమీక్షా సమావేశం నిర్వహించారు. రాష్ట్రంలో ప్రస్తుత పాల ఉత్పత్తి, భవిష్యత్ అవసరాలపై సమగ్ర నివేదికను వెంటనే సమర్పించాలని ఈ సందర్భంగా అధికారులను ఆయన ఆదేశించారు.
**విద్యార్థులకు పౌష్టికాహారం.. విజయ డెయిరీకి మహర్దశ**
రాష్ట్రంలోని ప్రభుత్వ పాఠశాలలు, అంగన్‌వాడీ కేంద్రాల్లో చదువుకుంటున్న సుమారు 27 లక్షల మంది విద్యార్థులకు సంపూర్ణ పోషకాహారం అందించే బృహత్తర కార్యక్రమానికి ప్రభుత్వం సన్నద్ధమవుతోందని ఉప ముఖ్యమంత్రి వెల్లడించారు. వీరందరికీ మన రాష్ట్ర ప్రభుత్వానికే చెందిన ప్రతిష్టాత్మక సంస్థ ‘విజయ డెయిరీ’ ద్వారానే స్వచ్ఛమైన పాలను సరఫరా చేసేందుకు పటిష్టమైన కసరత్తు చేస్తున్నట్లు ప్రకటించారు. ఈ నిర్ణయం ద్వారా అటు విద్యార్థులకు నాణ్యమైన పాలు అందడమే కాకుండా, ఇటు విజయ డెయిరీ ఆర్థికంగా మరింత బలోపేతం అవుతుందని ఆయన ఆశాభావం వ్యక్తం చేశారు. సంక్షేమ శాఖల ద్వారా అమలయ్యే ఈ పథకాలకు సంబంధించిన బిల్లుల చెల్లింపులు ఎక్కడా ఆగకుండా, ఆయా శాఖల నుంచే నేరుగా డెయిరీకి చెల్లింపులు జరిగేలా స్పష్టమైన విధానాన్ని రూపొందించాలని అధికారులకు దిశానిర్దేశం చేశారు.
**గ్రామీణ ఆర్థిక వ్యవస్థకు పాడి పరిశ్రమే జీవనాడి**
వ్యవసాయంపైనే ఆధారపడే రైతన్నలకు పాడి పరిశ్రమ ఒక అదనపు ఆదాయ వనరుగా, కొండంత అండగా నిలుస్తోందని భట్టి విక్రమార్క విశ్లేషించారు. గ్రామీణ ఆర్థిక వ్యవస్థ సమూలంగా మారాలంటే పాడి పరిశ్రమ మరింతగా అభివృద్ధి చెందాల్సిన అవసరం ఎంతైనా ఉందన్నారు. రైతులు ఎంతో కష్టపడి ఉత్పత్తి చేసే పాలకు సంబంధించిన బిల్లుల చెల్లింపుల్లో ఎలాంటి జాప్యం జరగకూడదని, వారికి ఒక్క రూపాయి కూడా బకాయిలు లేకుండా ఎప్పటికప్పుడు సకాలంలో చెల్లింపులు చేయాలని అధికారులను ఆయన తీవ్రంగా ఆదేశించారు. రాష్ట్రంలో పాలిచ్చే పశువుల వాస్తవ సంఖ్యను శాస్త్రీయ పద్ధతిలో కచ్చితంగా గుర్తించడానికి తక్షణమే చర్యలు చేపట్టాలని, తద్వారా పాల ఉత్పత్తిపై స్పష్టమైన అంచనాలకు రావచ్చని సూచించారు.
**ఆధునికత వైపు అడుగులు.. లాభసాటిగా పాడి రంగం**
తెలంగాణ రాష్ట్రంలో పాల ఉత్పత్తిని గణనీయంగా పెంచేందుకు సాంప్రదాయ పద్ధతులకు తోడుగా ఆధునిక విధానాలను సైతం అమలు చేస్తామని ఉప ముఖ్యమంత్రి స్పష్టం చేశారు. పాల ధరల నిర్ణయంలో రైతుల ప్రయోజనాలను రక్షించేలా ఒక పారదర్శకమైన, స్పష్టమైన విధానాన్ని తీసుకువస్తామన్నారు. పాడి పరిశ్రమను రైతుల పాలిట లాభసాటిగా, నమ్మకమైన ఉపాధి మార్గంగా మార్చడమే తమ ప్రభుత్వ అంతిమ లక్ష్యమని ఆయన ఉద్ఘాటించారు. ముఖ్యమంత్రి ఎనుముల రేవంత్ రెడ్డి దార్శనికత, సూచనల మేరకు పాడి రైతుల శ్రేయస్సు కోసం ఈ ప్రతిష్టాత్మక చర్యలన్నీ అత్యంత నిబద్ధతతో చేపడతామని భట్టి విక్రమార్క ఈ సందర్భంగా సగర్వంగా ప్రకటించారు.