అగ్రిగోల్డ్ బాధితులకు ఊరట….

అగ్రిగోల్డ్ బాధితులకు ఊరట.
* ఆస్తుల వేలం, ప్రత్యేక కోర్టు ఏర్పాటు దిశగా ఏపీ సర్కార్ అడుగులు.

అమరావతి, మహా.

అగ్రిగోల్డ్ డిపాజిటర్ల సమస్యను పరిష్కరించేందుకు రాష్ట్రంలోని కూటమి ప్రభుత్వం ప్రత్యేక దృష్టి సారించిందని మంత్రి నాదెండ్ల మనోహర్ స్పష్టం చేశారు. ముఖ్యమంత్రి చంద్రబాబు నాయుడు ఆదేశాల మేరకు ఈ సున్నితమైన అంశంపై ఇప్పటికే మూడు దఫాలుగా సమావేశాలు నిర్వహించినట్లు ఆయన వెల్లడించారు. అగ్రిగోల్డ్ డిపాజిటర్లు నిజమైన బాధితులని, వారికి న్యాయం జరిగేలా చూడటం ప్రభుత్వ బాధ్యత అని మంత్రి భరోసా ఇచ్చారు.
అగ్రిగోల్డ్ సంస్థకు ఆంధ్రప్రదేశ్‌లో దాదాపు 20 వేల ఎకరాల ఆస్తులు ఉన్నాయని, అందులో 6 వేల ఎకరాలకు పైగా భూమిని వేలం వేసేందుకు ప్రభుత్వం సిద్ధంగా ఉందన్నారు. ఈ ఆస్తుల వేలం ప్రక్రియను వీలైనంత త్వరగా ప్రారంభించాలని సీఐడీ అధికారులను కోరినట్లు మంత్రి తెలిపారు. గత సమావేశంలోనే అగ్రిగోల్డ్‌కు చెందిన చరాస్తుల విషయమై పోలీసు శాఖకు అవసరమైన స్పష్టమైన ఆదేశాలు ఇచ్చినట్లు ఆయన గుర్తుచేశారు.
ఈ కుంభకోణం స్థాయిని వివరిస్తూ.. అగ్రిగోల్డ్ సంస్థలో సుమారు ఐదు లక్షల మంది ఏజెంట్లుగా పనిచేశారని, ప్రజల నుంచి వారు దాదాపు రూ.6 వేల కోట్ల మేర డిపాజిట్లు సేకరించారని మంత్రి వివరించారు. ఇందులో ఒక్క ఆంధ్రప్రదేశ్ రాష్ట్రం నుంచే సుమారు రూ.3 వేల కోట్లు వసూలు చేసినట్లు ఆధారాలు ఉన్నాయన్నారు. మొత్తం 18 లక్షల 57 వేల 290 మందికి ప్లాట్లు ఇస్తామని నమ్మించి డిపాజిట్లు తీసుకున్నారని, ఈ వ్యవహారంపై మరింత లోతైన పరిశీలన జరిపి తగిన చర్యలు తీసుకోవాల్సిన అవసరం ఉందన్నారు.
బాధితులకు పారదర్శకంగా సమాచారం అందించేందుకు అగ్రిగోల్డ్‌కు సంబంధించిన పూర్తి వివరాలతో కూడిన ఒక ప్రత్యేక వెబ్‌సైట్‌ను త్వరలో అందుబాటులోకి తీసుకురానున్నట్లు మంత్రి ప్రకటించారు. అలాగే, తొమ్మిది రాష్ట్రాల నుంచి ఏజెంట్లు డిపాజిట్లు సేకరించిన నేపథ్యంలో.. ఆయా రాష్ట్రాల్లో బాండ్ల స్వీకరణ కోసం పోలీసు శాఖ సమన్వయంతో ప్రత్యేక సెల్‌లు ఏర్పాటు చేస్తున్నట్లు తెలిపారు. సెప్టెంబర్ 15వ తేదీ నాటికి ఈ ప్రక్రియను పూర్తి చేయాలని ప్రభుత్వం లక్ష్యంగా నిర్దేశించుకుంది.
ఈ కేసు విచారణను వేగవంతం చేసేందుకు ఆగస్టు 11న ప్రభుత్వ ప్రధాన కార్యదర్శితో (సీఎస్) సమావేశం నిర్వహించనున్నట్లు మంత్రి వెల్లడించారు. ముఖ్యమంత్రి ఆదేశాల మేరకు ఆగస్టు 15లోపు ఈ కేసుల విచారణ కోసం ఒక ప్రత్యేక కోర్టును ఏర్పాటు చేయాలని కోరుతున్నట్లు తెలిపారు. ఆస్తుల వేలానికి సంబంధించిన విధివిధానాలను సైతం త్వరలో ఖరారు చేసి, దశలవారీగా బాధితులకు న్యాయం జరిగేలా అన్ని నిర్ణయాలు తీసుకుంటామని మంత్రి నాదెండ్ల మనోహర్ స్పష్టం చేశారు.