పాక్ వ్యాఖ్యలకు భారత్ కౌంటర్.
• జమ్మూకశ్మీర్ భారత అంతర్భాగమే.
• జోక్యాన్ని సహించబోమన్న విదేశాంగ శాఖ.
ఢిల్లీ, మహా.
జమ్మూకశ్మీర్కు ప్రత్యేక హోదా కల్పించిన ఆర్టికల్ 370 రద్దు వార్షికోత్సవాన్ని ‘దోపిడీ దినోత్సవం’గా నిర్వహించాలన్న పాకిస్థాన్ వ్యాఖ్యలను భారత్ తీవ్రంగా ఖండించింది. జమ్మూకశ్మీర్, లద్దాఖ్కు సంబంధించిన అంశాలు పూర్తిగా భారత అంతర్గత వ్యవహారాలని, వాటిపై వ్యాఖ్యానించే హక్కు పాకిస్థాన్కు లేదని విదేశాంగ శాఖ స్పష్టం చేసింది. విదేశాంగ శాఖ అధికార ప్రతినిధి రణ్ధీర్ జైస్వాల్ మీడియాతో మాట్లాడుతూ పాకిస్థాన్ ఆరోపణలను పూర్తిగా తోసిపుచ్చారు.
జమ్మూకశ్మీర్, లద్దాఖ్ కేంద్ర పాలిత ప్రాంతాలు ఎప్పటికీ భారతదేశంలో అంతర్భాగమేనని రణ్ధీర్ జైస్వాల్ స్పష్టం చేశారు. 2019 ఆగస్టు 5న కేంద్ర ప్రభుత్వం తీసుకున్న నిర్ణయాలు పూర్తిగా రాజ్యాంగబద్ధమైనవని, అవి దేశ సార్వభౌమాధికార పరిధిలో తీసుకున్న అంతర్గత నిర్ణయాలని పేర్కొన్నారు. ఈ అంశంపై పాకిస్థాన్ చేస్తున్న వ్యాఖ్యలు భారత అంతర్గత వ్యవహారాల్లో జోక్యం చేసుకునే ప్రయత్నమేనని విమర్శించారు.
భారత్పై ఆరోపణలు చేయడానికి ముందు పాకిస్థాన్ తన ఆక్రమణలో ఉన్న కశ్మీర్ (పీఓకే)లో జరుగుతున్న మానవ హక్కుల ఉల్లంఘనలను అరికట్టాలని జైస్వాల్ సూచించారు. ఉగ్రవాద సంస్థలకు ఆశ్రయం కల్పించడం నిలిపివేసి, అక్రమంగా ఆక్రమించుకున్న భారత భూభాగాలను వెంటనే ఖాళీ చేయాలని పాకిస్థాన్ను కోరారు.
ఆర్టికల్ 370 రద్దు అనంతరం జమ్మూకశ్మీర్లో పరిపాలన, అభివృద్ధి, ప్రజాస్వామ్య వ్యవస్థ బలోపేతం అయ్యాయని ఆయన తెలిపారు. విద్య, మౌలిక సదుపాయాలు, పెట్టుబడులు, ఉపాధి అవకాశాలు పెరిగాయని, ప్రజల జీవన ప్రమాణాలు మెరుగుపడ్డాయని పేర్కొన్నారు.
పాకిస్థాన్ తన దేశంలో కొనసాగుతున్న మానవ హక్కుల ఉల్లంఘనలు, ఉగ్రవాదానికి నిలయంగా ఉన్న ముద్ర నుంచి ప్రపంచ దృష్టిని మళ్లించేందుకే భారత్పై నిరాధార ఆరోపణలు చేస్తోందని జైస్వాల్ మండిపడ్డారు. పాక్ ఆక్రమిత కశ్మీర్లో తమ హక్కుల కోసం శాంతియుతంగా నిరసనలు వ్యక్తం చేస్తున్న ప్రజలపై అక్కడి భద్రతా బలగాలు దమనకాండకు పాల్పడుతున్నాయని ఆరోపించారు. జూన్ నెల నుంచి జరిగిన సైనిక చర్యల్లో సుమారు 90 మంది, జులై 27న స్థానిక సంస్థల ఎన్నికల సందర్భంగా 40 మందికి పైగా అమాయకులు ప్రాణాలు కోల్పోయారని పేర్కొంటూ పాకిస్థాన్ ద్వంద్వ వైఖరిని ఎండగట్టారు.
దక్షిణాసియాలో శాంతి భద్రతలకు భారత్ ముప్పుగా మారుతోందన్న పాకిస్థాన్ విదేశాంగ మంత్రి ఇషాక్ దార్ వ్యాఖ్యలను కూడా భారత్ పూర్తిగా తిరస్కరించింది. అవి రాజకీయ ప్రేరేపిత, ఆధారరహిత ఆరోపణలు మాత్రమేనని విదేశాంగ శాఖ స్పష్టం చేసింది. జమ్మూకశ్మీర్ అంశంపై పాకిస్థాన్ చేస్తున్న దుష్ప్రచారం ఎలాంటి ఫలితాన్నీ ఇవ్వదని, భారత్ తన సార్వభౌమాధికారాన్ని కాపాడటంలో ఎప్పటికీ రాజీపడదని విదేశాంగ శాఖ తేల్చిచెప్పింది.
