ఆగని ఇందిరమ్మ ఇళ్ల పథకం.
• మరో మూడు విడతల్లో ఇళ్ల మంజూరు.
• బీఆర్ఎస్‌ అప్పులు.. ఎల్‌నినో ప్రభావం ఉన్నా వెనక్కి తగ్గం.
• వచ్చే దీపావళి నాటికి ఇందిరమ్మ టవర్లు పూర్తి చేస్తాం.
• మంత్రి పొంగులేటి ప్రకటన
హైదరాబాద్‌, మహా:
పేదల సొంతింటి కలను సాకారం చేయడమే లక్ష్యంగా తెలంగాణ ప్రభుత్వం అమలు చేస్తున్న ఇందిరమ్మ ఇళ్ల పథకం నిరంతరాయంగా కొనసాగుతుందని రాష్ట్ర రెవెన్యూ, హౌసింగ్‌, సమాచార పౌరసంబంధాల శాఖ మంత్రి పొంగులేటి శ్రీనివాసరెడ్డి స్పష్టం చేశారు. గత బీఆర్ఎస్‌ ప్రభుత్వం రాష్ట్రంపై మోపిన అప్పుల భారం, ఎల్‌నినో వంటి ప్రకృతి పరిస్థితులు ఎదురైనా పథకాన్ని నిలిపివేసే ప్రసక్తే లేదని తేల్చిచెప్పారు. అర్హులైన పేదలకు మరో మూడు విడతల్లో ఇళ్లు మంజూరు చేస్తామని ప్రకటించారు. హైదరాబాద్‌ పరిధిలో నిర్మిస్తున్న ఇందిరమ్మ టవర్లను వచ్చే దీపావళి నాటికి పూర్తి చేయాలని ప్రభుత్వం లక్ష్యంగా పెట్టుకుందని వెల్లడించారు.
రాజేంద్రనగర్‌, మహేశ్వరం నియోజకవర్గాల పరిధిలోని లబ్ధిదారులకు ఇందిరమ్మ టవర్లలో ఫ్లాట్ల కేటాయింపు ప్రక్రియ ప్రారంభమైంది. ఇందులో భాగంగా మైలార్‌దేవుపల్లిలో నిర్మించనున్న ఇందిరమ్మ టవర్లకు మంత్రి పొంగులేటి శంకుస్థాపన చేశారు. ఈ కార్యక్రమంలో రంగారెడ్డి జిల్లా ఇన్‌ఛార్జి మంత్రి, ఐటీ శాఖ మంత్రి దుద్దిళ్ల శ్రీధర్‌బాబు, స్థానిక ఎమ్మెల్యే ప్రకాశ్‌ గౌడ్‌ పాల్గొన్నారు. లబ్ధిదారుల ఎంపిక కోసం నిర్వహించిన లక్కీడ్రాలో కవిత రాథోడ్‌కు సీ బ్లాక్‌లో 603వ నంబరు ఫ్లాట్‌ కేటాయించారు. మంత్రులు ఆమెకు కేటాయింపు ధ్రువీకరణ పత్రాన్ని అందజేశారు.
ఇందిరమ్మ ఇళ్ల పథకం అమలులో కులం, మతం, రాజకీయ పార్టీ అనే తేడా లేకుండా అర్హులైన వారిని పారదర్శకంగా ఎంపిక చేస్తున్నామని పొంగులేటి తెలిపారు. క్యూర్‌ పరిధిలోని 23 నియోజకవర్గాల్లో ఈ ప్రక్రియ కొనసాగుతోందని వివరించారు. సొంతింటి కల నెరవేరిన పేద కుటుంబాల ముఖాల్లో కనిపిస్తున్న ఆనందం ప్రభుత్వానికి ఎంతో సంతృప్తినిస్తోందన్నారు. లబ్ధిదారుల కళ్లలో కనిపిస్తున్న ఆనందబాష్పాలే ప్రభుత్వానికి ఆశీస్సులని భావోద్వేగంగా పేర్కొన్నారు.
అప్పుల భారం ఉన్నా పేదలకు అండగా
గత బీఆర్ఎస్‌ ప్రభుత్వం రాష్ట్రంపై లక్షల కోట్ల రూపాయల అప్పుల భారం మోపిందని మంత్రి విమర్శించారు. ఆర్థిక ఇబ్బందులు ఉన్నప్పటికీ పేదలకు ఇచ్చిన హామీల అమలులో ప్రజా ప్రభుత్వం వెనక్కి తగ్గదని స్పష్టం చేశారు. ఎల్‌నినో వంటి ప్రకృతి పరిస్థితులు ఎదురైనా ఇందిరమ్మ ఇళ్ల పథకం కొనసాగుతుందని భరోసా ఇచ్చారు. పేదల ఇళ్ల నిర్మాణం, ఫ్యూచర్‌ సిటీ వంటి అభివృద్ధి కార్యక్రమాలపై కొందరు చేస్తున్న విమర్శలను ప్రస్తావిస్తూ ప్రభుత్వం తన లక్ష్యాల నుంచి పక్కకు తప్పుకోదని పేర్కొన్నారు. ఆరు ప్రధాన హామీలను తప్పకుండా అమలు చేస్తామని తెలిపారు.
మూడు విడతల్లో కొత్తగా ఇళ్ల మంజూరు
ఇందిరమ్మ ఇళ్ల మంజూరు ఒకేసారి పూర్తయ్యే కార్యక్రమం కాదని, నిరంతర ప్రక్రియగా కొనసాగుతుందని మంత్రి వెల్లడించారు. ఇప్పటికే ఇళ్లు పొందిన వారితో పాటు ఇంకా అర్హత ఉన్న కుటుంబాలకు కూడా అవకాశం కల్పించేలా మరో మూడు విడతల్లో ఇళ్లను మంజూరు చేయనున్నట్లు ప్రకటించారు. దీంతో ఇప్పటివరకు ఇళ్లు మంజూరు కాని అర్హులైన పేద కుటుంబాల్లో ఆశలు చిగురిస్తున్నాయి. తదుపరి విడతల తేదీలు, లబ్ధిదారుల ఎంపికకు సంబంధించిన మార్గదర్శకాలను ప్రభుత్వం వెల్లడించాల్సి ఉంది.
ఈ నెల 19 నుంచి బతుకమ్మ చీరలు
మహిళలకు మరో శుభవార్తను కూడా మంత్రి ప్రకటించారు. ఈ నెల 19 నుంచి నాణ్యమైన చిలకాకు పచ్చ రంగు బతుకమ్మ చీరలను పంపిణీ చేయనున్నట్లు తెలిపారు. పండుగ కానుకగా మహిళలకు చీరలు అందించేందుకు ఏర్పాట్లు చేస్తున్నట్లు వెల్లడించారు. ఈ కార్యక్రమంలో మాజీ ఎమ్మెల్యే కిచ్చన్నగారి లక్ష్మారెడ్డి, గృహ నిర్మాణ శాఖ ఎండీ వి.పి. గౌతమ్‌, రంగారెడ్డి జిల్లా కలెక్టర్‌ నారాయణరెడ్డి, మాజీ మేయర్‌ పారిజాతం, ఇతర ప్రజాప్రతినిధులు, అధికారులు పాల్గొన్నారు.
