మరోసారి వార్తల్లో వైరల్ గర్ల్ మోనాలిసా.
* పోలీసులను ఆశ్రయించిన యువతి.
* తండ్రి నుంచి ప్రాణహాని ఉందని ఫిర్యాదు.
ఎర్నాకులం, మహా.
ప్రయాగ్రాజ్ కుంభమేళా సందర్భంగా సోషల్ మీడియాలో వైరల్గా మారిన మోనాలిసా మరోసారి వార్తల్లో నిలిచారు. తన తండ్రి నుంచి ప్రాణహాని ఉందని ఆరోపిస్తూ కేరళలోని ఎర్నాకులం సెంట్రల్ పోలీస్ స్టేషన్ను ఆశ్రయించారు. తన పాస్పోర్ట్, డబ్బును తండ్రి తీసుకున్నారని ఆరోపిస్తూ, తనకు తక్షణ పోలీసు రక్షణ కల్పించాలని అధికారులను కోరారు. ఈ ఘటనతో మోనాలిసా కుటుంబ వివాదం మరోసారి చర్చనీయాంశంగా మారింది.
ఆదివారం సాయంత్రం తన న్యాయవాదితో కలిసి ఎర్నాకులం సెంట్రల్ పోలీస్ స్టేషన్కు వెళ్లిన మోనాలిసా, తన భద్రతను పునరుద్ధరించాలని కోరుతూ పోలీసులకు లిఖితపూర్వకంగా దరఖాస్తు సమర్పించారు. అనంతరం మీడియాతో మాట్లాడిన ఆమె, తన తండ్రి తన పాస్పోర్ట్తో పాటు డబ్బును కూడా తీసుకున్నారని, తన ప్రాణానికి ముప్పు ఉందని ఆరోపించారు. తనకు వెంటనే భద్రత కల్పించాలని పోలీసులను విజ్ఞప్తి చేశారు.
ఇదిలా ఉండగా, మోనాలిసా భర్త ఫర్మాన్ ఖాన్పై మధ్యప్రదేశ్లో కిడ్నాప్ కేసు నమోదైంది. మోనాలిసా మైనర్ అని పేర్కొంటూ ఆమె తండ్రి ఇచ్చిన ఫిర్యాదు ఆధారంగా పోలీసులు కేసు నమోదు చేశారు. అయితే తాను మేజర్నని, తన స్వచ్ఛంద నిర్ణయంతోనే ఫర్మాన్ ఖాన్ను వివాహం చేసుకున్నానని మోనాలిసా చెబుతున్నట్లు సమాచారం. ఈ అంశంపై విచారణ కొనసాగుతోంది.
ఇంతకుముందు కూడా తనకు ప్రాణహాని ఉందని పేర్కొంటూ మోనాలిసా కేరళ హైకోర్టును ఆశ్రయించారు. ఆ సమయంలో ఆమెకు పోలీసు రక్షణ కల్పించాలని హైకోర్టు ఆదేశించింది. అయితే అనంతరం మోనాలిసా, ఆమె భర్తతో పోలీసులు సంప్రదింపులు జరపలేకపోవడంతో ఈ విషయాన్ని కోర్టు దృష్టికి తీసుకెళ్లారు. దాంతో అప్పటివరకు కల్పించిన భద్రతను ఉపసంహరించుకోవాలని కోర్టు ఆదేశించింది. అయితే భవిష్యత్తులో వారు మళ్లీ పోలీసులను సంప్రదిస్తే అవసరమైన రక్షణ కల్పించవచ్చని కూడా స్పష్టం చేసింది.
తాజాగా మోనాలిసా మరోసారి పోలీసులను ఆశ్రయించడంతో ఈ కేసు మళ్లీ ప్రాధాన్యం సంతరించుకుంది. ఆమె ఫిర్యాదుపై కొచ్చి నగర పోలీస్ కమిషనర్తో సంప్రదించిన అనంతరం తదుపరి చర్యలపై నిర్ణయం తీసుకుంటామని ఎర్నాకులం సెంట్రల్ పోలీస్ స్టేషన్ అధికారులు తెలిపారు.
ప్రయాగ్రాజ్ కుంభమేళా సందర్భంగా తన ప్రత్యేక రూపంతో సోషల్ మీడియాలో ఒక్కసారిగా వైరల్ అయిన మోనాలిసా దేశవ్యాప్తంగా గుర్తింపు పొందారు. అనంతరం ఆమె వ్యక్తిగత జీవితం, ఫర్మాన్ ఖాన్తో వివాహం, కుటుంబ సభ్యులతో వివాదాలు, న్యాయపరమైన వ్యవహారాలు, పోలీసు ఫిర్యాదుల కారణంగా తరచూ వార్తల్లో నిలుస్తున్నారు.
.
